Maamulka gobalka Shabeelaha Hoose ayaa faahfaahiyey howlgal Ciidanka Danab ee Xoogga dalka ay kula wareegeen degmada Aw-dheegle ee gobolka Shabeellaha Hoose.
Guddoomiyaha gobalka Shabeellaha hoose, Ibrahim Aadan Cali Najax oo goordhaw wareysi gaar ah siiyey Warbaahinta Qaranka ayaa Sheegey in Ciidanka Xoogga dalka ay si buuxda gacanta ugu dhigeen degmada Aw-dheegle ee gobolka Shabeellah Hoose.
Mudane Najax ayaa intaa ku darey in hadda ay Ciidanku waddaan howlgal ay ku baarayaan miinooyinka argagixisadu ay ku aastey degmada iyo waddooyinka soo gala si ay ugu dhibaateeyaan Shacabka Soomaaliyeed.
Guddoomiyaha ayaa sidoo kale sheegay in ay jiraan howlgallo ballaaran oo lagu baacsanayo haraadiga argagixisada ee ku sugan deegaanno ka tirsan gobolka, si looga dulqaado dadka rayidka oo ay ku haayaan dhibaato xooggan,isagoo xusay in aysan jirin khasaaro soo gaaray dadka Shacabka ah.
Muddooyinkii dambe Ciidamada Xoogga dalka ayaa howlgallo ka waday deegaanno badan oo maleeshiyaadka Al-shabaab ay ku sugnaayeen, iyadoo argagaxisada ay soo wajahday cabsi xooggan oo uga imaaneysa Ciidamada sida gaarka u tababaran ee DANAB oo gacanta cadawga ka saaray degmooyin badan oo ka tirsan gobolka Shabeellaha Hoose.
