Madaxweynaha Maamulka Jubaland Axmed Maxamed Islaam ayaa maanta kulan qado sharaf ah u sameeyay guddiga isku dhafka ah ciidamada Qaranka oo shalay gaaray magaalada Kismaayo ee xarunta Gobolka Jubbada Hoose, halkaasi oo ay u tageen sidii ciidamada la isku dhafi lahaa.
Kulanka qadada ah ayaa waxaa ka qeyb galay Wasiirka difaaca ee Soomaaliya, wasiiru-dowladaha gaashaandhigga ee xukumadda, xubno kale oo ka tirsan dowladda Federaalka ah iyo mas’uliyiinta maamulka Jubaland, kaasi oo looga hadlay doorka maamulkaasi uga aadan ka qeyb qaadashada dhismaha ciidamo Qaran oo isku dhaf ah.\
Madaxweynaha Maamulka Jubaland Axmed Maxamed Islaam oo kulanka qadada hadal ka jeedyay ayaa Wasiirka Gaashaandhigga ee xukuumadda Soomaaliya Mudane Cabdiqaadir Sheekh Cali Diini iyo guddiga isku dhafka ah uga mahadceliyay howlaha shaqo ee ay ku jogaan magaalada Kismaayo.
“Waxaan rabnaa in askariga laga soo qoro xaafuun, kan raas kambooni laga soo qoray iyo kan gobobolada kale laga keeno in la isugu geeyo meel lagu tababaro, waa arrin aad u muhiimsan oo ay bulshada dooneysay, arrintan ha noqoto mid taariikh ah, arrinta ciidanka oo la isu keeno, iyaga ayaa dib u heshiisiin isugu filan, waa arrin muhiim ah” ayuu yiri
Magaalada Kismaayo oo uu horey ugu sugnaa Wasiirka Gaashaandhigga Soomaaliya ayaa waxaa shalay halkaasi gaaray guddiga isku dhafka ciidamada Qaranka, si deegaannada Jubbooyinka looga soo qoro ciidamado ka mid noqonaya howsha ay guddiga u joogaan Kismaayo.
