Kulan lagu wacyi gelinayay Haweenka degaannada Koofur Galbeed Soomaaliya ayaa maanta lagu qabtay Magaalada baydhabo oo xarun ku meel gaar u ah maamulkaasi.
Kulankan oo ay si wada jir ah usoo qaban qaabiyeen Wasaaradda arrimaha gudaha iyo Dowladaha hoose ee Koofur Galbeed iyo hay’adda Somali One ayaa lagu gorfeeyay sida ugu habboon ee ay Haweenku door lixaad leh uga qaadan karaan dhismaha golaha degaanka.
Haweenka ka qayb galay munaasabaddaasi oo ka kala yimid Magaalooyinka Baydhaba iyo Baraawe ayaa waxay isku dhaafsadeen aaraah la xiriirta doorta firfircoon ee ay bulshadu kaga jiraan Haweenka iyo sida ay lagama maarmaanka u tahay inay ka muuqdaan metelaadda shacabkooda.
Agaasimaha guud ee wasaaradda arrimaha gudaha iyo dowladaha hoose ee maamulka koofur galbeed Cumar Maxamed Macallin ayaa ugu horreeyn u mahad celiyay ciddii ka gacan siisay barnaamijkan, wuxuuna si weyn ugu boorriyay Dumarku inay kaalintooda bannaanka soo dhigaan isla markaana ay qaataan kaalintooda kaga aaddan hagidda Bulshadooda.
Qaar ka mid ah Gabdhihii ka soo qeybgaley kulanka ayaa sheegay in Haweenka ay kaalintooda kasoo dhalaali doonaan, door libaaxna ay ka qaadan doonaan dhimaha golayaasha degaanka, si weyna ugu muuqan doonaan xildhibaannada lasoo dhisi doono dhawaan.
Kulankan wada tashiga Geeddi socodka hannaanka dhismaha Golaha degaanka Degmooyinka Baraawe iyo Baydhabo ayaa waxaa uu qayb ka yahay shirar Joogta ah oo wasaarada arrimaha gudaha iyo hay ‘adda Somali one ay si wadajir ah uga qaban doonaan qaybaha bulshada rayidka ee Degmooyinka Baraawe iyo Baydhabo .
