Xafladan oo sanadkiiba mar la qabto ayaa lagu abaalmariyaa Macalimiintii ugu wanaagsanaa Jaamcadda Plasma waxaana goob joog ka ahaa Guddoomiyaha Jaamcadda Plasma, Madaxa Ururka dhaqaatiirta Soomaaliyeed, aqoonyahanno, Macalimiin, iyo Marti sharaf kale.
Ustaad Maxamed Cabdullahi oo ka mida Guddiga qiimeenta Macalimiinta ayaa sheegay in macalinka lagu soo xusho dhanka dadaalka uu u galo wax baridda ardayda, isagoo xusay in qaabka loo soo xulay shaqsiyaadka muteystay abaalmarinadan ay ka eegeen dhinacyo badan.
Guddoomiyaha Ururka Dhaqaatiirta Soomaaliyeed Dr Maxamed Yuusuf oo xafladda ka hadlay ayaa sheegay iney abaalmarintan dhiirigelin u tahay Macalimiinta oo shaqo adag bulshada u haya, uuna dhiiri gelinayo abaalmarinta nuucaani oo kale ah.
Guddomiyaha Jaamcadda Plasma Xasan Maxamed Xasan Kaafi ayaa sheegay iney sii wadi doonaan abaalmarin siinta Macalimiinta oo laf dhabar u ah hanaanka waxbarasho ee dalka iyo sare u qaadidda tacliinta sare.
Ugu dambeyn waxaa abaalmarino la gudoonsiyeey macalimiinta kaalmaha hore ka galay qiimeentii la sameeyay, waxaana kaalinta koowaad galay Eng, Maxamuud Abuukar Xasan oo la guddonsiiyey gaari kaas oo u mahad naqay Maamulka Jaamcadda Plasma oo abaalmarintan u gartay.
