Shir wada-tashi ah oo ay isugu yimaadeen Hay’adda Maaraynta Musiibooyinka (SoDMA) iyo duubabka dhaqanka beelaha Soomaaliyeed ayaa looga hadlay sidii looga hortagi lahaa colaadaha sokeeye, loogu diyaar-garoobi lahaa isku-filnaansho iyo ka kaaftoomidda ku tiirsananta kaalmada bani’aadannimo ee dibadda, xoojinta nidaanka dowladnimada, la shaqeynta iyo ilaalinta bad-qabka samafalayaasha iyo sidii loo hubin lahaa in gargaarku gaaro dadkii u baahan ee loogu tala-galay.
Guddoomiyaha Hay’adda Maareynta Musiibooyinka, Mudane Maxamuud Macallin Cabdulle oo duubab-ka dhaqanka ku soo dhaweeyay xarunta dhexe ee SoDMA, ayaa ku dheeraaday muhiimadda ay duubabku u leeyihiin dadaallada nabadda, wada-hadallada iyo dib-u-heshiisiinta bulshada, isagoo xusay in shirkaan fursad wax-ku-ool ah u yahay sidii looga hortagi lahaa colaadaha oo sababa dhibaatooyin bani’aadannimo oo mararka qaar noqda masaa’ib dad-samey ah oo daran.
Guddoomiye ku xigeenka Hay’adda Dr. Axmed Cabdi Aadan oo isna khudbad ka jeediyay shirka ayaa duubabka ku aammaanay doorkooda nabadeynta iyo isku heynta bulshada, isagoo adkeeyay in dhaqanku sii xoojiyaan kaalinta ay u taagan yihiin ee xoojinta nabadda, si looga baaqsado ama xal loogu helo gacan-ka-hadalka laga baaqsan karo ee dhex mara dadka walaalaha ah, looguna gudbo fulinta mashaariicda dhisaysa adkeysiga iyo ka faa’iideysiga adeegyada dowladda.
Ugaasyada, Imaamyada, Malaaqyada, Salaadiinta, Garaaddada, Isimmada, Wabarrada, Boqorrada, Nabaddoonnada iyo guud ahaan duubabka dhaqanka ee kulanka ka qeyb-galay ayaa Hay’adda SoDMA ku ammaanay shaqada ay shacabka Soomaaliyeed u heyso, iyaga oo sheegay in shirkaan uu xoojinayo wada-shaqeynta bulshada iyo hay’adaha dowliga ah, sidii loo heli lahaa xalka lagu wajahayo caqabadaha dalka ka taagan, gaar ahaan colaadaha sokeeye, abaaraha iyo musiibooyinka kale.
