Madaxda iyo Shaqaalaha Wasaaradda Waxbarashada ee Xukuumadda Federaalka Soomaaliya ayaa maanta ka qeyb qaatay Barnaamijka Isxilqaan oo dib loogu dhisayo Golaha Murtida iyo Wacyigelinta Qaranka oo ku burburay dagaaladii dalka ka dhacay.
Shaqaallaha Wasaaradda oo ay horkacayaan Wasiirka iyo wasiir ku xigeenka wasaaradda Waxbarashada ayaa iyaggoo wata agabka Wax lagu dhiso waxay kaalin weyn ka qaateen maanta dhismaha ka socda Xarunta Golaha Murtida iyo Wacyigelinta Qaranka.
Qaar kamid ah Shaqaallaha Wasaaradda oo Warbaahinta Qaranka la hadlay ayaa sheegay in usoo diyaar garoobeen Barnaamijka Isxilqaan, iyaggoo xusay in heegan ay u yihiin Ololaha dib loogu dhisayo goobaha danta guud ah.
Wasiirka Wasaaradda Waxbarashada Xukuumadda Soomaaliya Mudane C/laahi Goodax Barre ayaa tilmaamay in Shaqaalaha iyo Madaxda Wasaaradda ay mar kasta diyaar u yihiin inay ka qayb qaataan dib u dhiska dalkaan.
