Ololaha Isxilqaan oo uu horey u iclaamiyay Madaxweynaha Jamhuuriyadda FS ayaa ah mid looga go’leeyahay in ummudda Soomaaliyeed ay gacmahooda ku dhistaan dalkooda oo kasoo kabanaayo marxalad bur-bur ah islamarkaana aan lagu tashanin gacan shisheeye.
Madaxda Gobolka Banaadir iyo ururka dhallinyarada Gobolka Banaadir ayaa si wadajir ah barnaamijka Isxilqaan ka fuliyay xarunta Tiyaatarka Qaranka oo kamid ah xasuusihii Astaamaha Qaranka waxaana masuuliyiintan iyo dhallinyarada ay si Isxilqaan ah ku nadiifiyeen xarunta Tiyaartarka si loo so celiyo bilicdii iyo heybadii ay xaruntani laheyd birisamaadkii.
Xoghaayaha maamulka Gobolka Banaadir Cumar Cabdirisaaq Xuseen ayaa sheegay in maamulka Gobolka uu taageerayo qorshahan lagu horumarinayo dalka.
Guddoomiye kuxigeenka arimaha bulshada maamulka gobolka Banaadir Basma Caamir Jakeeti ayaa howshaan Isxilqaan ku tilmaantay talaabadii ugu wanaagsaneed ee dalka dib loogu dhisayo.
Guddoomiye kuxigeenka amniga iyo siyaasadda Gobolka Banaadir Maxamed Cabdullaahi Maxamed (Tuulax) ayaa dhankiisa sheegay in barnaamijka isxilqaan uu yahay fursad hortaala ummudda Soomaaliyeed.
