Kuwani waa Carruurtii ay dhaleen Wariyaashii geeriydooday siyaabo kala duwan laga soo bilaabo sanadku markuu ahaa 2007 illaa horaanta sanadkan 2019.
Waxaa leysugu keenay Beerta Nabadda 82 canug mid kasta oo kamid ahna waxaa uu helay 50 dollar taas oo ka timid Madaxtooyada Soomaaliya looguna talo galay inay ku ciidaan.
Waxaa isku xilqaamay oo soo aruuriyey carruurtan qeyb kamid ah Wariyaasha oo uu Hogaan u ahaa Cabdullaahi Cismaan Faarax.
Munaasabadda lagu gudood siiyey waxaa ka qeyb galay Masuuliyiin NOSUJ, Xafiiska Madaxweynaha ee dhanka Warfaafinta iyo Madaxda Warbaahinta gaarka loo leeyahay.
Cabdullaahi Xirsi iyo Xasan Maxamed Maxamuud oo ka socday Warbaahinta gaarka loo leeyahay ayaa sheegay in loo baahan yahay in leyska wareysto siddii carruurtan agoonta ah Waxbarashadooda looga warqabi lahaa.
Cabdirisaaq Jaamac Cilmi “Black” oo ka socday Xafiiska Madaxweynaha ee dhanka Warfaafinta ayaa tilmaamay in Madaxtooyadu diyaar u tahay garab siinta wax kasta oo agoonta wax loogu qabanayo.
“Waxaan diyaar u nahay in aan mar kasta garab ka geysano wax kasta oo carruurtan agoonta ah wax loogu qabanayo dhankasta ha’ahaatee runtii carruuntan ay ka tageen saaxiibadeen waxaa naga saaraan waajibaad gaar ah”
Xogayaha NOSUJ Maxamed Ibraahim Macalimuu ayaa dhankiisa tilmaamay inay ku dadaalayaan sidii Carruurtu u heli lahaayeen Waxbarasho lacag la’aan ah iyaga oo arrinkaas kala faarinsan doona Schooladda iyo Jaamacadaha dalka.
Sanadkii hore ayaa sidan oo kale carruurtan loo qeybiyey lacago loogu talo galay inay ku Ciidaan taas oo Madaxtooyada Qaranku ka saaciday, inkastoo tiradda carruurtu markaas ahaayeen ka kordheen waxaana hadda laga xusi karaa oo ku soo darsamay 9 carruur ah oo aan qaarin oo uu dhalay Allah u naxariisto Cabdirisaaq Aadan Qoslaaye.
