Wafdi uu hogaaminayo Madaxwaynaha dowlad goboleedka Galmudug Mudane Cakariin Xuseen Guuleed oo socdaal shaqo ku tegay deegaanka Galinsoor ee gobolka Galgaduud ayaa maanta dib ugu soo laabtay magaalada Cadaado ee xarunta KMG ee maamulka Galmudug.
Mudane Cabdikariin Xuseen Guuleed oo la hadlay Warbaahinta ayaa ka warbixiyay socaalkii uu ku tegay deegaanka gelin soor iyo sida loogu soo dhaweeyay.
“Waxaan ka soo samaynay maamul KMG oo u gogol xaara dib u heshiisiinta soo socota iyo gogosha la dhigi doono magaalada Galinsoor oo dadkii wada dhashay ee magaalada wada daganaa dib la isugu soo celin doono, culumaa’udiinka wadahadal aad u dheer ayaan la yeelanay, si aad u qurux badan ayaan isugu fahanay dhamaan wixii aan ka wada hadalnay” ayuu yiri Mudane Cabdikariin oo hadalkiisa ku daray. “Waxaan ugu dambayntii soo booqanay saldhigii gaaska Dhaanka Roone oo aan rabo inay ka mid noqoto meelaha la dajindoono ciidamada xoogga dalka Soomaaliyeed iyo ciidamada Galmudug, waxaan soo indho-indhaynay qaybaha ay ka koobnayd xeradu, waxaana rajaynaynaa mar aan fogan in dayactir lagu bilaabo si ay u noqoto xero tababar”.
Waa markii labaad oo wafdi uu hogaaminayo Madaxwaynaha Galmudug ay hawlo shaqo ku tagaan deegaanka Galinsoor, waxaana hadda Galinsoor ka shaqo bilaabaya maamulkan cusub ee la sameeyay.
Sawir Qaade:- Maxamuud Cabdi Diirshe
