Madaxweynaha Dawlad goboleedka Puntland Cabdiweli Maxamed Cali Gaas kormeeray goobo ay ka-mid yihiin Xarunta Dawladda Hoose ee Degmada Boosaaso, Isbitaalka guud ee magaalada iyo Xarunta Guriga Gobolka Bari, waxaana uu kulamo kula qaatay mas’uuliyiinta kala duwan ee xarumahaasi isagoo ka-xog waraystay xaaladda guud ee bulshada loo adeegayo iyo shaqada dhabta ah ee ka socoto dhammaan xarumahaasi.
Mudane Cabdiweli ayaa faray Maamulka gobolka Bari, kan Degmada Boosaaso iyo kan Isbitaalka guudba in ay dar-dargeliyaan shaqooyinka ay bulshada u hayaan, iyagoo bulshada u muujinaya debecsanaan iyo hawlkarnimo, isagoo dhanka kale booqday Xarunta Ciidanka Badda Puntland, halkaasi oo uu salaam sharaf kaga qaatay boqollaal askari oo tababar uga socdo xaruntaasi.
Madaxweynaha Dawladd Goboleedka Puntland oo goob fagaare ah kula hadlay ciidanka tababbarka ku-jira ayaa ku ammaanay isbeddelka ka muuqday muddadii yarayd ee uu tababarku u-socdey, isagoo kula dar-daarmay in ay dedaal dheeraad ah muujiyaan si’ay markuu tababbarku u-soo xidhmo ay uga soo baxaan iyagoo wata aqoon tayo le oo ay dalkooda ku difaaci karaan.
“Ciidanka waxaa ugu muhiimsan waxa weeyaan in waddaniyad lagu beero,weliba dalkooda difaaciisa iyo wanaagiisa lagu tababaro oo lagu hago weeye” ayuu yiri Dr.Gaas.
