Madaxweynaha Dawlad goboleedka Puntland Cabdiweli Maxamed Cali Gaas ayaa maanta kulan la qaatay in kabadan 30 hay’adood oo isugu jira kuwo caalami ah iyo kuwo maxalli ah, kuwaas oo dhammaantood ka hawl-gala deegaannada maamulka Puntland.
Cabdiweli Maxamed Cali Gaas ayaa hay’adahaasi waxaa uu kala hadlay xaaladda abaaraha ee ka jirta deegaannada Puntland iyo sidii wax looga qaban lahaa, maadaama laga cabsi qabo in abaare horleh ay ku dhuftaan deegaanada Puntland.
Madaxweynaha Dawlad goboleedka Puntland ayaa markii uu soo dhammaaday kulankaasi waxaa uu bahda saxaafadda uga waramay xaaladda abaareed ee ka jirta deegaanada Puntland, isagoo baaq u diray hay’adaha Caalamiga ah in ay gacan ka geystaan abaaraha ka jira Puntland.
Cabdiweli Maxamed Cali Gaas ayaa sheegay in qaar ka mid ah gobollada Puntland ay yihiin meelaha ugu daran ee ay abaaraha saameeyeen welibana ay kamid yihiin dhulka lafilayo in ay kusoo wajahan yihiin abaaro kale oo horleh.
