Madaxweynaha Dowlad goboleedka Puntland Dr. Cabdiweli Maxamed Cali Gaas ayaa maanta daahfuray Sanad Dugsiyeedka 2015/2016 ee Jaamacadda Global Science University ee magaalada Gaalkacyo.
Kahor inta uusan daahfurin xafladda ayuu kormeeray qeybaha uu ka koobanyahay cisbitaalka GMC ee magaalada Gaalkacyo, waxaana halkaasi uu warbixin kaga dhagaystay maamulka cisbitaalkaasi , isagoo dhammaan booqday bukaanada kujira cisbitaalka Gaalkacyo.
Xafladda Daahfurka Sanad Dugsiyeedka Jaamacadda Global Science University waxaa sidoo kale goob joog ahaa Guddoomiyaha Baarlamaanka Puntland Siciid Xassan Shire, Wasiiro, Xildhibaanno ka tirsan Maamulka Puntland, Waxgarad, Aqoonyahan , Ardey iyo masuuliyiin kale.
Mudane Cabdiweli Maxamed Cali Gaas oo khudbad dhinacyo badan taabanaysay ka jeediyey madasha ayaa sheegay inuu si aad ah ugu faraxsan yahay ka qeyb-galka munaasibadda, waxaana uu ardeyda u rajeeyey mustaqbal wanaagsan oo ifaya .
“Dalka markii ay dadkiisu waxbartaan ayuu gaaraa horumar, marka waa in aynu ku dadaalno waxbarista dadkeena, qof keli ahna ma qaadi karo mas’uuliyadaas, Jaamacadaheena dalka inaynu tayeynu ayaa laynaga rabaa, oo qofka ka soo baxaya uu noqdo qof leh shahaadada uu wato aqoonteeda , macanaheeduna waxa weeye qofka soo galayana Jaamacadda in uu noqdo qof la hubo waxbarashadiisa”ayuu yiri Madaxweyneha Dowlad goboleedka Puntland.
Madaxa Gaalkacyo Medical Center Dr. Cabdulqaadir Maxamuud Dhagacadde ayaa Dr Cabdweli Gaas gudoonsiiyey shahaado sharaf uu ku mutaystay dadaalka uu ugu jiro sare uqaadista waxbarashada.
