Madaxweynaha Dowlad goboleedka Puntland Cabdiweli Maxamed Cali Gaas ayaa madaxtooyada Garoowe ku qaabilay wefti uu hogaaminayey madaxa xafiiska UNSOM Puntland Mr. Aaward Bell.
Mr. Aaward Bell iyo weftiga uu hogaaminayo waxaa ay ka wada hadleen arrimo la xidhiira doorashooyinka iyo abaaraha kajira Puntland
Weftigan ka socday xafiiska UNSOM ee Puntland ayaa waxa ay ugu horayn Puntland ku bogaadiyeen hanaanka geedisocod ee doorashooyinka heer Federal ee Puntland ka socda, doorashooyinkaas oo Puntland si habsami ah uga socda, waxayna sidoo kale tibaaxeen in beesha caalamka iyo Qaramada Midoobey ay sidhow ula socoto dedaalada dheeriga ah ee Puntland ku bixisay sidii ay u hir geli lahayd hanaanka Dimuqraadiyada Soomaaliya.
Madaxweynaha Puntland Cabdiweli Maxamed Cali Gaas ayaa dhankiisa ugaga mahad celiyey Madaxda xafiiska UNSOM Mr. Aaward Bell kawarhaynta iyo lasocodka doorashooyinka ka socda Puntland, sidoo kalena uga warbixiyey doorashada aqalka hoose ee haatan ka socota Puntland halka ay marayso.
Ugu danbayn Dr Cabdiweli Gaas ayaa weftiga ka socdey xafiiska UNSOM si qoto dheer uga xog bixiyey xaaladda abaareed ee ka jirta Puntland welibana u sheegay in loo baahan yahay in gurmad deg deg ah loo fidiyo dadka ay abaaruhu saameeyeen, isagoo tilmaamay in ay muhiim tahay in beesha caalamku ay qayb libaax ka qaataan kana qayb galaan gurmadka loo fidinayo dadka ay abaaruhu ku habsadeen.
