Madaxweynaha Dowlad Goboleedka Galmudug Mudane Axmed Cabdi Kaariye oo uu hareer fadhiyo ku-xigeenkiisa Mudane Cali Daahir Ciid ayaa Guddoomiyey Shirka Golaha Wasiirada oo maanta looga hadlay qodobo kala duwan, laguna meelmariyey afar (4) Hindise sharciyeed.
Kulanka ayaa ugu horreyn warbixin la xiriirta amniga looga dhageysatay Wasiirka Amniga Gudaha oo golaha usoo bandhigay qorshaha dib u xorreynta Deegaannada maqan.
Golaha ayaa go’aamiyey in la xoreeyo deegaanka kujira gacanta argagixisada, lana bilaabo howlgallo ka dhan ah Al-Shabaab.
Sidoo kale shirka ayaa lagu soo hadalqaaday falkii gurracnaa ee todobaadkan ka dhacay Cabudwaaq. waxaana hoosta laga xariiqay in gacanta lagu soo dhigo shaqsiyaadkii geystay fal-danbiyeedkaas.
Golaha Wasiirada Galmudug ayaa go’aamiyey in si daahfuran loo soo xulo Agaasimeyaasha Guud ee Wasaaradaha. waxayna u xilsaareen Guddi ka kooban Wasiiradaha; Maaliyadda, Shaqadda, Waxbarashadda, iyo Caafimaadka inay ka gacansiiyaan Hay-adda Shaqaalaha Rayidka ee Dowlad Goboleedka Galmudug arrintaas.
Ugu danbeyntio Golaha ayaa kulankooda ku meelmariyey sharciyada; Sharciga Nootaayada, Sharciga Guddiga Adeegga Garsoorka, Sharciga Kalluumeysiga iyo Sharciga Shirkadaha Ganacsiga.
