Madaxweynaha Dowlad Goboleedka Hirshabelle Mudane Cali Guudlaawe Xuseen iyo wafdi balaaran oo uu hogaaminayo ayaa maanta si diiran loogu soo dhoweeyay Garoonka diyaaradaha Ugaas Khaliif ee Magaalada Beledweyne.
Madaxweynaha Hirshabeelle iyo Wafdigiisa oo ka koobnaa Wasiir Ku Xigeenka Wasaaradda Ganacsiga XFS iyo Xubno isugu jiray labada aqal ee Baarlamaanka Federaalka Soomaaliya waxaa garoonka Ugaas khaliif ee Magaalada Beledweyne kusoo dhoweeyay Gudoomiyaha Baarlamaanka Dowladda Hirshabeelle Mudane Cabdixakiin Luqmaan Xaaji Maxamed, Maamulka Gobolka Hiiraan, Masuuliyiin iyo Qeybaha kala duwan ee Bulshada.
Mudane Cali Guudlaawe ayaa bogaadiyay howlgalada lagu ciribtirayo kooxaha khawaarijta ee ka socda deegaannada Hirshabeelle isagoo tilmaamay in khawaarijta looga adkaaday dhamaan deegaanadii lagula diriray, qeybaha kala duwan ee ciidamadana ay u diyaar yihiin xureynta deegaanada iyo degmooyinka ay wali ku dhuumaaleysanayaan kooxahaan cadowga ah.
