Madaxweynaha Dowladda Jubaland mudane Axmed Maxamed Islaam, ayaa maanta magaalada Kismaayo ka daah-furay Wakaaladda Biyaha Jubbaland oo ay hirgalisay Wasaaradda Tamarta iyo Kheyraadka Biyaha.
Munaasabadda daah-furka Wakaaladda Biyaha Jubbaland, waxaa Madaxweynaha ku wehelinayay Wasiirka Wasaaradda Tamarta iyo Biyaha, xubno kamida Wasiirada iyo Xildhibaanada Golaha Wakiilada, Xildhibaano heer Federaal ah iyo masuuliyiin kale.
Madaxweynaha Dowladda Jubbaland,ayaa daah-furka kadib kormeer ku sameeyay qeybaha kala duwan oo ay ka koobantahay Wakaaladda, sida xafiisyada, qeybta sheybaarka iyo qeybta keydka Wakaaladda.
Madaxweynaha oo munaasabadda daah-furka ka hadlay, ayaa yiri ” Wakaaladda la daah-furay saddex u jeedo ayaa laga leehahay, kow waa sidii bulshada ay u heli laheyd Biyo ku filan, tan labaad Biyo nadiif ah,iyo tan seddexaad oo ah Biyo khiimo jaban leh oo ay dadka dhan guryahooda loo galiyo”.
Madaxweynaha Dowladda Jubbaland mudane Axmed Maxamed Islaam, ayaa bogaadiyay dhammaan madaxda iyo howlwadeenada Wasaaradda Tamarta iyo Biyaha shaqa wanaagsan oo ay u qabteen dadkooda.
Dhanka kale Madaxweynaha Dowladda Jubbaland Mudane Axmed Maxamed Islaam oo uu weheliyo Wasiirka Wasaaradda Tamarta iyo Kheyraadka Biyaha, ayaa dhagax dhigay dhismaha xafiisyada Wakaaladda Tamarta oo dhawaan la hirgalinayo.
