Madaxweynaha Maamulka Jubbaland Mudane Axmed Maxamed Islaam ayaa maanta xafiiskiisa ku qaabiley madax ka socotey hay’adda UNHCR oo ay hogaamineysey Wakiilka UNHCR ee Soomaaliya Bushra Halepota si ay ugala hadlaan arirmaha qoxootiga Kenya ee la doonayo in dib loogu soo celiyo Soomaaliya.
Axmed Islaam ayaa sheegey inay aad ugu faraxsanyihiin soona dhaweynayaan qoxootiga Soomaaliyeed ee kusoo laabanaya dalkooda, balse waxa uu ka digay in qoxootiga lasoo daabulo ayaga oo aan loo sameynin dib u dajin sax ah.
Madaxda UNHCR ayaa sheegtey inay ka fikirayaan sidii ay dib u dejin sax ah ay ugu sameyn lahaayeen qoxootiga lasoo celinayo, ayada oo loo dhisayo guryo , iskuulo iyo xarumo caafimaad.
UNHCR ayaa sheegtey in dhawaan uu madaxa ugu sareeya ee UNHCR imaan doono dalka Kenya si uu kulan saddex geesood ah ula qaato Kenya, Dowladda Federaalka ah ee Soomaaliya, si looga arrinsado qadiyadda ku aadan qaxootiga Soomaaliyeed ee dalka Kenya ku nool.
Madaxweynaha Jubbaland ayaa ugu danbeyntii u sheegey Madaxda UNHCR in ay bixinayaan dhulkii ladajin lahaa qoxootiga sidoo kalena ay sugayaan amnigooda guud ahaan.
Intaas kadib madaxda UNHCR ayaa kulan xog wareysi ah la qaatey Guddiga Qaxootiga u qaabilsan Dowladda Jubbaland, kaas oo ay madax ka tahay Marwo Maryan Awcali iyo Labo guddi oo ka kala yimid qoxootiyada Dhadhaab Kenya iyo Qoxootiyada dalka Yemen oo hadda ah kuwa ugu daran.
Gudigii ka socdey Qoxootiga dalka Yemen oo ka koobnaa 3 xubnood ayaa sheegay in dalka Yemen aysan ka jirin wax nolol ah oo la sii fiirsado ee ay u baahanyihiin gurmad deg deg ah oo dadkaas lala gaaro, halka gudiga ka socdey qoxootiga Dhadhaab ee dalka Kenya ay aad uga cowdeen xayiraadda lagu soo rogey Xawaaladaha Soomaalida ee ka howlgala Kenya, kuwaas oo sababey inay dad biilka dibada looga soo diri jirey ay lasoo daristo nolol la’aan baahsan, taasi oo qeyb ka ah dhibaatooyinka haysato Qaxootiga Soomaaliyeed ee ku nool Gobolka Waqooyi barri ee dalka Kenya.
