Madaxweynaha dowlad goboleedka Puntland Cabdiweli Maxamed Cali Gaas ayaa maanta dhagax dhigay garoonkii diyaaradaha ee magaalada Garoowe ee caasimadda Puntland kaas oo dib u habeyn lagu sameyn doono si uu u noqdo garoon caalami ah.
Munaasibadda dhagax dhigga Garoonka ayaa waxaa kasoo qayb galay Guddoomiyaha Golaha Wakiilladda Puntland Axmed Cali Xaashi, Guddoomiye ku-xigeenka Golaha Wakiillada Cabdixamiid Sheekh Cabdisalaam, Madaxweynihii hore ee Puntland Dr. Cabdiraxmaan Maxamed Faroole, Madaxweyne ku-xigeenkii hore General Cabdi-semed Cali Shire, Wasiiro, Xildhibaano, Masuuliyiinnta iyo Shaqaalaha Shirkadda Turkiga ah ee dhisaysa Madaarka, ganacsato, saraakiil ciidan iyo dadweyne kale oo aad u tira badan.
Dr. Cabdiweli Maxamed Cali Gaas ayaa ka sheekeeyey marxaladihii uu soo maray helitaanka mashruucan lagu dhisayo garoonka diyaaradaha ee Garoowe, isagoo uga mahadceliyey Dawladda aan walaalaha nahay ee Kuwait mashaariicda horumarineed ee ay ka fulisey deegaannada maamulka Puntland kuwaas oo ay ka-mid yihiin Garoonka diyaaradaha ee Garoowe iyo Jaamacadda Maakhir.
Madaxweynaha Dowlad goboleedka Puntland ayaa ballan qaaday dardar gelinta dhismaha garoonkan in aanu cidna ku hallaynayn uu il gaar ah ku hayn doono, si looga mira dhaliyo himilada horumarineed ee shacabka reer Puntland.
