27 Maarso 2015, Sharm El Sheikh: Madaxweynaha Jamhuriyadda Federaalka Soomaaliya, Mudane Xasan Sheekh Maxamuud ayaa ka degey magaalada Sharm El Sheikh ee waqooyiga Masar, oo uu kaga qeybgeli doono shir madaxeedka Jaamacadda Carabta.
Madaxweynaha iyo wafdigiisa waxaa garoonka diyaaradaha si diiran ugu soo dhoweeyay Madaxweynaha Masar Abdel Fattah el Sisi iyo mas’uuliyiin sare oo ka tirsan dowladda Masar.
Labada madaxweyne ayaa garoonka ku yeeshay wadahadal kooban oo ay isaga xog wareysteen xaaladaha labada waddan iyo xiriirka ka dhexeeya.
Wafdiga Madaxweynaha Soomaaliya ee ka qeybgali doona shir madaxeedka ayaa waxaa ka mid ah wasiirrada Arrimaha Dibedda iyo Maaliyadda, Cabdisalaam Hadliye Cumar iyo Maxamed Aadan Ibraahim, iyo weliba mas’uuliyiin kale.
Shir madaxeedka Jaamacadda Carabta ee sannadkan ayaa ajendaha ugu weyn waxaa uu noqon doonaa xasaradda ka aloosan Yemen, mashaakilaadka ka taagan waddamada kale ee Carabta iyo dagaalka caalamiga ee ka dhanka ah argagixisada.
-DHAMMAAD-
