Madaxweynaha Jamuuriyada Federaalka Soomaaliya Mudane Xasan Sheekh Maxamuud ayaa kulan afur iyo casha sharaf ah u sameeyay mas’uuliyin isugu jira Xilbaanno iyo Wasiiro ka tirsan Xukuumada Soomaaliya.
Kulanka isugu jirta afurka iyo cashada ee lagu qabtay xarunta Madaxtooyada ayaa waxaa goob joog ka ahaa Guddoomiyaha Maxkamadda Sare ee dalka, Ku-xigeenka Ra’iisul wasaaraha, xubno ka tirsan labada gole ee dowladda, siyaasiyiin iyo marti sharaf kale.
Wasiirka Warfaafinta, dhaqanka iyo dalxiiska ee Xukuumadda Soomaaliya Mudane Maxamed Cabdi Xayir Maareeye ayaa Madaxweynaha Jamhuuriyadda uga mahadceliyay kulanka uu u sameeyay, isagoo xusay in maanta ay tahay maalintii koowaad ee todobaadka xoriyadda.
“Waxaan marka hore Madaxweynaha Jamhuuriyadda Federaalka ah ee Soomaaliya uga mahadcelinayaa xusuusta uu xusuustay munaasabadda 26-ka Juun, oo xalay ahayd, isla markaana la saaray xalay meeshii lixdankii laga taagay, waa maalintii ugu horeysay oo gobollada ka mid ah dalka oo xor noqday, Madaxweyne waxaan kaaga mahadcelineynaa in aan mar labaad sidaan oo kale u kulano” ayuu yiri Wasiir Maareeye.
Madaxweyne Xasan Sheekh Maxamuud oo soo gabo gabeeyay kulanka afurka iyo cashada ayaa sheegay in 26-ka Juun ay tahay maalin ku weyn dhammaan Ummadda Soomaaliyeed, isagoo hambalyo u diray guud ahaan shacabka, gaar ahaan bulshada ku nool gobollada Waqooyi ee dalka.
“Waxaan markale rabaa in aan iraahdo hambalyo guud Ummadda Soomaaliyeed meelkasta oo ay joogaan, gaar ahaan waxaan si gaar ah ugu sii hambalyaynayaa dadka Soomaaliyeed ee qiimaha badan leh ee ku nool Gobollada Waqooyi ee dalka Soomaaliya, oo aan leenahay si gaar ah hambalyo, waxaan rabaa fariinta Walaalaha waqooyiga Soomaaliya ku nool, waxaan leenahay, walaalayaal maanta waa farxad waan wada wadaagnaa, waa taariikh, ma ahan waqooyi iyo koonfur kaliya e, qofkasta oo Soomaali ah, meelkasta oo calanka kaga noolyahay Jamhuuriyadda dhexdeeda iyo xuduudaha Jamhuuriyadda banaankeedaba, maalin un uu tirsanayo, uu sheeganayo, uu ku faanayo weeyaan, marka xafladan waa maalintaas sidaas u weyn ee aan caawa isugu nimid, waxaana haysanaa fursad aan isku soo celin karno Midnimadii shalay, dhamaanteen qadiyadda ku aadan dib suu celinta Midnimada ayaan safiiro u nahay haddii aan joogno Hargeysa ama Muqdisho” ayuu yiri Madaxweynaha.
