Madaxweynaha dowlad goboleedka Puntland Mudane Siciid Cabdullaahi Deni ayaa Daah-furay Mashruuc Waxbarasho, kaas oo halku dhiggiisu yahay Ifiye.
Munaasabadda Daah-furka ayaa waxa kasoo qayb galay Wasiirka Waxbarashada ee Puntland, Madaxwaynihii hore ee Puntland Senator Cabdiraxman Maxamed Maxamuud Faroole, Senator Cabdirisaaq Xuseen Cismaan Juurile, Guddoomiye ku-xigeenka Labaad ee Golaha Wakiillada Ismaaciil Maxamed Warsame, Wakiilka Puntland ee Dalka Maraykanka Mulki Cabdisamed Xuseen oo ka mid ah Aasaasayaasha Mashruuca Waxbarashada ee Ifiye iyo masuuliyiin kale.
Mashruucan oo in muddo ah howshiisa laga soo shaqaynaayey waxaa ka faa’iidaysan doona ardayda reer Puntland, waxaana iska-kaashanaya hirgelintiisa Dawlad goboleedka Puntland iyo qurbajoogta Puntland. Mashruucani waxa uu xoogga saarayaa Waxbarashada carruurta ee maadooyinka Sayniska, Tijnoolajiyadda (Technology), injineerinka (Engineering) iyo Xisaabadka.
Qurba joogta reer Puntland ee mashruucan taageeraysa ayaa diiradda saaraya in 10,000 (toban kun) oo Kambiyuutar loo gadaayo Ardayda dugsiyada Puntland, waxaana mashruuca lagu bilaabayaa 18 dugsi oo iskugu jira dugsiyo Hoose iyo dugsiyada Sare.
Madaxwaynaha Puntland ayaa balan qaaday in Madaxtooyada Puntland ay sanadkiiba ku taageerayso mashruuca 1,000 (kun) Kambiyuutar si kor loogu qaado aqoonta ardayda reer Puntland si ay awood ugu yeeshan maadooyinka Sayniska. Mudane Siciid Cabdullaahi Deni oo Mashruucan daah-furay ayaa ku dheeraaday muhiimadda uu u leeyahay ardayda Puntland.
“Waxaan aad ugu faraxsanahay in mashruucan kusoo beegmo iyada oo 15-ka bishaan Puntland ay u balansan tahay inay wadatashi ka yeelato Puntland Horumarkeeda iyo xaaladda ay marayso iyo caqabadaha hortaagan, waxaan rajaynayaa halku-dhigyada kasoo bixi doona inay qayb ka noqon doonaan tayeynta tacliinta” Ayuu yiri Madaxwaynaha Dawladda Puntland
Sidoo kale Madaxweynaha Dawlad goboleedka Puntland ayaa madaxda Wasaaradda Waxbarashada ku booriyay inay si hoose u eegaan Waxbarashada farsamada gacanta.
Ugu dambayn, Madane Siciid Cabdullaahi Deni ayaa u mahadceliyey Wasaarada Waxbarashada Puntland iyo Qurba joogta gacanta ka gaysatay, isagoo kula dar-daarmay in mashruucan iyo kuwa lamidka ahba la dhowro.
