Madaxweynaha Soomaaliya ayaa sheegay in howshan maanta lagu qabtay dadaalka ay sameeyeen shacabka iyo ciidamada qalabka sida ee Soomaaliya.
Madaxweyne Xasan Sheekh Maxamuud ayaa xusay in la sugay amniga magaalada, isagoo mahadcelin u jeediyay ciidamada qalabka sida ee Soomaaliya, oo kaashanaya kuwa Nabad ilaalinta Midowga Afrika ee AMISOM.
“Waxay noo ahayd maalin nagu weyn, qiimo iyo waqti badan ayaa lagu bixiyay, waxaan uga mahadcelinayaa ciidamada qalabka sida, sida ay ugu guuleysteen sugidda amniga magaalada” ayuu yiri Madaxweynaha Soomaaliya.
Madaxweynaha Jamhuuriyadda Soomaaliya Mudane Xasan Sheekh Maxamuud ayaa sheegay in cadowga Ummadda Soomaaliyeed uusan ogolaan lahayn in Soomaaliya ay marti geliso shir heer sare ah.
“Soomaaliya way ku qabsoomayaan shirar kuwan oo kale oo si heer sare ah loo soo agaasimay, waxaana shacabka uga mahadcelinayaa sida ay u muujiyeen dulqaadka muddada uu socday shirka IGAD iyo intii lagu guda jiray marti gelinta shirka ee ay waddooyinka u xirnaayeen xaqiijinta amniga” ayuu yiri Madaxweyne Xasan.
“Madaxweynaha Kenya waxaan ka wada hadalnay sidii loo xoojin lahaa xiriirka labada dal iyo iskaashiga dhaqaalaha, waxaana isku afgaranay arrimo badan oo labada dal quseeya” ayuu Madaxweynaha hadalkiisa ku daray.
