Madaxweynaha Jamhuuriyadda Federaalka Soomaaliya Mudane Maxamed Cabdullaahi Farmaajo iyo wafdi uu hoggaaminayo ayaa gaaray magaalada Cammaan ee dalka Urdun, halkaasi oo uu Madaxweynuhu kaga qeyb geli doono shir Madaxeedka 28aad ee Jaamacadda Carabta.
Madaxweyne Maxamed Cabdullaahi Maxamed Farmaajo ayaa shirka ka jeedin doono khudbad uu kaga hadlayo xaaladda dalka, gaar ahaan dhinacyada amniga, horumarka iyo abaarta ka jirta qeybo ka mid ah gobollada dalka.
Waxaa kale oo jiri doona kulamo gaar gaar ah oo wafdiga Madaxweynaha Soomaaliya ay la yeelan doonaan qaar kamid ah wufuudda dowladaha Carbeed ee Shirka ka qeyb galaya.
Madaxweynaha ayaa ku sii hakaday Garoonka Diyaaradaha ee Jabuuti, halkaas oo uu qadar 30 daqiiqo ah kula qaatay Ra’iisul Wasaaraha Jabuuti Cabdiqaadir Kaamil Maxamed.
Diyaaradda waday wafdiga Madaxweynaha ayaa sidoo kale ku hakatay magaalada Madiina Al Munawara inta aanay u duulin Boqortooyada Urdun.
