Madaxweynaha Maamulka Puntland Mudane Siciid Cabdullaahi Deni oo ku hadlaya magaciisa iyo kan Goleyaasha Maamulka Puntland wuxuu uga tacsiyeynayaa shacabka Soomaaliyeed ee waxyeeladu saaka kasoo gaartey qaraxii Muqdisho ka dhacay, kaas oo uu cadawga ummada Soomaaliyeed ku xasuuqay dad shacab ah oo aan waxba galabsan, waxaana uu Alle uga baryey Madaxweynuhu inuu u naxariisto shacabkii halkaasi ku nafwaayey oo u badnaa arday iyo xoogsato la daalaa-dhacaayey noloshooda, una boogadhayo intii ku dhaawacantay falkaasi wuxuushnimada ah.
Madaxweynaha Puntland waxaa uu ugu baaqayaa dhammaan shacabka Soomaaliyeed, Dowladda Federaalka ah iyo Dowladdaha xubnaha ka ah in si wada jira loogu istaago sidii cadowga ummada Soomaaliyeed ee argagixisada ah meel looga soo wada-jeesan lahaa, loogana hor tegi lahaa dhagarta ay mar waliba u maleegayaan dadka rayid ka ah.
Dhanka kale Madaxweynaha maamul goboleedka Galmudug Mudane Axmed Ducaale Geelle Xaaf ayaa ka tacsiyeeyay weerarkii bahalnimada ahaa ee Argagixisadu ku xasuuqday shacabka Soomaaliyeed ee ku sugnaa Isgoyska Ex-koontarool Afgooye ee magaalada Muqdisho.
Madaxweyne Xaaf waxa uu Tacsi u diray Ehelada dadkii ku nafwaayay goobtaas iyo guud ahaan Ummadda Soomaaliyeed, sidoo kalana waxa uu caafimaad u rajeeyay dhamaanba Muwaadiniinta ku dhaawacantay qaraxaasi.
