Madaxweyne ku-xigeenka Dowlad Goboleedka Galmudug mudane Cali Daahir Ciid ayaa maanta kormeer ku tegay Waasaradda Maaliyadda dowlad Goboleedka Galmudug, halkaas oo uu ku soo dhaweeyay Wasiirka Maaliyadda Galmudug Farxaan Cali Maxamuud iyo Wasiir ku-xigeenka Mukhtaar Cali Cusmaan.
Madaxwayne ku-xigeenka Galmudug ayaa warbixin ka dhagaystay Wasiirka Wasaarada Maaliyadda, taas oo ku saabsan shaqada ka socota Wasaaradda isagoo mid mid u kormeeray xafiisyada kala duwan ee Wasaaradda.
Wasiir Farxaan ayaa sheegay in si habsimi leh ay u socdaan nidaamka canshuuraha ee dowlad goboleedka Galmudug, isagoo Madaxweyane ku xigeenka kaga mahadceliyay maamulkii uu dhawaan u magacaabay Caabudwaaq, kaas oo hadda si wanaagsan ula shaqeeya Waasaradda Maaliyadda, wuxuuna intaas raaciyay in Caabudwaaq ay ka mid tahay kastamyada ugu waa wayn ee Galmudug.
Dhinaca kale Wasiirka Maaliyadda Galmudug ayaa sheegay in ay ku guulaysteen bixinta mushaaraadka dhammaan qaybaha kala duwan ee maamulka galmudug, sida mushaaraadkda xildhibaanada kuwa ciidamada iyo shaqaalaha dowlada.
Ugu danbyan madaxwene ku xigeenka dowlad goboleedka Galmudug Cali Daahir Ciid ayaa wasiirka Maaliyadaa iyo dhammaan shaqaalaha wasaaradda ugu mahadceliyay shaqada wanagsan ee ay bulshada u hayaan waxa uuna ku dhiiri galiyey in ay sii laba jibaaran shaqada.
