Madaxweynaha Dowlad Goboleedka Hirshabelle Dr; Maxamed Cabdi Waare, ayaa uga tacsiyeeyay guud ahaan Shacabka Soomaaliyeed, Qoysaska iyo eheladii ay ka baxeen Dadkii Rayidka ahaa ee ku shahiiday weerarkii Argagixiso ee Xalay lagu qaadey Hotel Cas-casey ee Magaalada Kismaayo.
“Innaa Lillahi wa Innaa Ileyhi raajicuun, anigoo ku hadlaya magaca golayaasha Hirshabelle, Shacabka Hirshabelle iyo keygaba waxaan tacsi u dirayaa qoysaskii iyo eheladii ay ka shahiideen dadkii argagixisada ku gumaadeen Magaalada kismaayo.
Madaxweyne Waare, ayaa sheegay in muhiim ay tahay shacab iyo ciidanba ay u istaagaan ka hortaga kooxaha cadowga ah ee isku biirsaday leynta iyo dabargoynta Umadda Soomaaliyeed.
“Waxaa weerarkani ay kooxaha naf la caariga ah la beegsanayaan shacabka aan waxba galabsan ay muujinayaan guuldarrooyinka isdaba-joogga ah ee ku habsadey. Waxaa nasiib wanaag ah in shacabka, dowladda dhexe, iyo Dowlad Goboleedyada ay si wadajir ah isaga kaashanayaan dagaalka lagula jiro cadowga. Waxaana weeraradan waxashnimo ee argagixisada ujeeddada laga leeyahay ay tahay in lagu cabsi geliyo shacabka si aanay u taageerin dowladnimada iyo nabadda’’ ayuu Yiri Madaxweyne Waare.
Sidoo kale Magaalada Kismaayo ayuu xusay Madaxweynuhu in ay ka mid eheyd magaalooyinka ugu nabdoon waxaana maamulka Jubbaland iyo shacbigiisa uu ugu baaqay in ay ka shaqeeyaan xasiloonida deegaannadooda xili la filayo dhowaan in doorashada Jubbaland ay dhacdo.
Madaxweynaha ayaa ammaan u jeediyay Ciidanka Maamulka Jubaland sida deg-degga ah ee ay uga jawaabeen weerarka argagixiso ee xalay dadkaasi lagu laayay, islamarkaana ay u soo afjareen.
Madaxweynaha Dowladda Hirshabelle Dr;Maxamed Cabdi Waare, oo sii hadlay ayaa Ilaahay uga baryey dadkii ku shahiiday weerarkan inuu Ilaahay naxariistii Jannatul Fardowsa ka waraabiyo, intii ku dhaawacantey uu caafimaad buuxa siiyo, qoysaska iyo eheladii dadkooda ay ku waxyeeloobeenna uu samir iyo iimaan ka siiyo.
