Madaxweynaha JFS mudane, Xasan Sheekh Maxamuud iyo wafdi ballaaran oo uu hoggaaminayo ayaa goor dhow gaaray magaalada Baydhabo oo xarun kumeelgarka u ah maamulka koofur galbeed.
Xubno ka mid ah golaha wasiirrada, xildhibaanno iyo taliyaha ciidanka xoogga dalka ayaa qayb ka ah safarka madaxweynaha, waxaana garoonka diyaaradaha Baydhabo kusoo dhoweeyay madaxweynaha KG Cabdicasiis Xasan Maxamed, mas’uuliyiin ka titsan maamulka iyo qeybaha kala duwan ee bulshada.
Madaxweyne Xasan Sheekh Maxamuud ayaa lagu wadaa inuu kulamo la qaato madaxweynaha dowlad goboleedka koofur galbeed, Cabdicasiis Xasan Maxamed (Lafta gareen) iyo mas’uuliyiin ka tirsan maamulkaasi.
Waa safarkii ugu horreeyay ee uu madaxweyne Xasan Sheekh kaga ambabaxo Muqdisho tan iyo xilligii la doortay 15kii bishan May.
