Ceelriiga Magaaladda Xudur oo biyo la’aan ahaa in ka badan bil ayaa maanta dib u shaqo bilaabay waxaana ay reer xudur toos u heleen biyihii ceelka oo si rasmi ah dib ugu shaqo bilaabay.
Ceelka ayaa shaqadiis u joogsatay cilad soo wajahday tubooyinka iyo qeybo ka mid ah qalabka gudaha ceelka , waxaana adkaatay in qalabkaas lasoo gaarsiiyo magaalada Xudur oo ay go’doomiyeen Maleeshiyaadka kooxda Argagixisada ah ee Al-shabaab.
Maamulka Degmada Xudur iyo qaar ka mid ah Shacabka Magaalada ayaa u mahadceliyey Hay’ada ACF oo dadaal badan gelisay sidii qalabkaas loo soo gaarsiin lahaa Magaalada Xudur isla markaana u soo kiraysay diyaarad.
Guddoomiyaha degmada Xudur Maxamed Macalin iyo Agaasimaha waaxda biyaha wasaarada tamarka iyo kheyraadka Koonfur Galbeed Liibaan Axmed Cabdulashi ayaa sheegay in ceelkaan uu yahay isha keliya bulshadaan biyo ka helaan , waxayna xuseen baahida loo qabo in ceelal kale laga hirgeliyo Magaalada Xudur.
