Marwada Madaxweynaha Dalka Marwo Sahro Cumar Xasan ayaa maanta kulan qado sharaf ugu sameysay xarunta Madaxtooyada ee Villa Soomaaliya Xildhibaanada haweenka ah ee ku jira baarlamaanka Federaalka Soomaaliya, kaasi oo ujeedkiisu ahaa xuska maalinta haweenka Adduunka, gaar ahaan Haweenka Soomaaliyeed.
Xildhibaan Fowsiyo Yuusuf Xaaji Aadan Wasiirkii hore ee Arrimaha dibadda ee Soomaaliya, kana mid ah baarlamaanka Federaalka ah ee Soomaaliya oo munaasabada hadal kooban ka jeedisay ayaa uga mahadcelisay Marwada Madaxweynaha kulanka qadada ah ee maanta ay u sameysay Xildhibaannada haweenka ee Baarlamaanka ku jira..
Marwada Madaxweynaha Dalka Marwo Sahro Cumar Xasan ayaa xuska 8-da Maarso Maalinta Haweenka caalamka awgeed hambalyo iyo bogaadin u dirtay haweenka Soomaaliyeed.
Marwada Madaxweynaha Dalka ayaa Guddoomiyaha ururka Haweenka Qaranka Batuulo Sheekh Axmed Gabale uga tacsiyadeysay geeridii naxdinta lahayd ee ku timid wiilkeeda oo ku geeriyooday dalka Canada.
Kulankan qadada ayaa ahaa mid Marwada Madaxweynaha Dalka Marwo Sahro iyo Xildhibaannada haweenka ah ee ku jira Baarlamaanka ay ku kala warqaadanayeen xaaladda dalka iyo doorka siyaasadeed ee ay haweenku ku leeyihiin dalka.
