Hay’adda shaqaalaha Adduunka ee marka magacooda la soo gaabiyo loo yaqaan ILO ayaa mashruuc loogu magac daray xalka waara ku daahfurtay magaalada Baydhaba.
Mashruucan oo ay maalgelineyso dowladda Japan ayna fulineysay hay’adda maxaliga ee MMC oo xiriir shaqo la leh Hay’adda ILO ayaa waxaa ka faa’iideysan doona 320 ruux oo 160 kamid ah yihiin dadka kusoo gurya noqday dalkooda ee ka yimid wadamada dersika sida Kenya, Ethiopia iyo Yemen.
Sidoo kale mashruucan waxaa ka faaideysan doona 96 kamid ah Dadka Dalka gudihiisa ku barakacay (IDPs)-ka iyo 54 ka mid ah dadka liita ee ku dhaqan magaalada Baydhaba.
Hay’adda MMC ayaa mudo 4 bilood ah dadka ka faa’iideysanaya bari doonta xirfado kala duwan oo u sahli doona inay shaqo ku heelaan, sida uu sheegay Madaxa hay’adda MMC Mudane Sid Cali Baafo waxaa jira in mudada tababarka ay sameyn doonaan tababar barashada Ganacsiga ah ah oo ay ka qayb galayaan dhamaan 320-ka.
“Tartan qorshe ganacsi ay wada gali doonaan ka faaideysteyaasha ayaa lagu soo xuli doonaa 160 kamid ah oo ku heli doonaa abaalmarin lacageed oo gaareysa $500 oo ah lacag ganacsi lagu bilaabayo.” ayuu yiri Sid Cali Baafo.
Martida lagu casuumay ayaa ka Mahad celiyay waxqabadka isdaba-jooga ah ee hay’adda ILO mashaariic wax ku ool ka hirgelisay magaalada Baydhaba.
Munaasabadan oo ahayd mid si heer sare loo soo agaasimay waxaa ka qaybgalay Odayaasha Dhaqanka, Ururada bulshada raydka, Madaxda heer degmo iyo heer gobol, Wasiirkuxigeenka shaqada iyo shaqaalaha Koonfurgalbeed, Agaasimaha Waaxda shaqada ee Wasaaradda Shaqada iyo Shaqaalaha Dowladda Federalaaka Soomaaliya.
Siraaji Sheekh Isxaaq
