Mashaariicdaan oo ay iska kaashanayaan Wasaaradda Arimaha gudaha Soomaaliya, ,hey’adda IOM iyo Wasaaradda howlaha guud iyo guriyeenta maamulka Hirshabeele ayaa waxaa dhagax dhigay Wasiir ku xigeenka Wasaaradda howlaha guud ahna ku simaha Wasiirka Cabdiraxmaan Cabdi Iidow, waxaana laga fulinayaa degmada Cadalle ee gobolka Shabeelaha Dhexe.
Mashruuca kowaad ayaa waxaa lagu dhisayaa guriga Hooyooyinka degmada Cadalle oo markii ugu horeysay halkaas laga sameynayo si howlaha ay u baahan yihiin haweenka degmada loogu qabto, ayada oo sido kale ay u kaashan doonaan xaruntaasi in lagu qabto tababaro kor loogu qaadayo aqoonta haweenka iyo farsamooyinka gacanta sida uu Radio Muqdisho u sheegay Cabdiraxmaan Cabdi Iidow oo ah Wasiir ku xigeenka howlaha guud iyo guriyeenta maamulka Hirshabeelle.
“Mashruucaan waxaa lagu sameynayaa guriga hooyooyinka iyo dhallaanka waxaa uu waxbadan ka badalayaa nolosha haweenka sida in ay ku qabsadaan shirarka u gaarka ah,tababaro ku qaataan ay kor ugu qaadayaan aqoontooda maadaama ay haweenka lafdhabar u yihiin bulshada”ayuu yiri Iidow.
Mashruuca labaad ayaa waxaa dib u dayac tir lagu sameynayaa iskuulka Hoose Dhexe ee Sheekh Axmed, kaa oo wax lagu bari doono carruurta ku nool degmada Cadalle, waxaana iskuulkaan uu ka mid ahaa goobahii ku burburay dagaaladii sokeeye ee dalka ka dhacay
“Iskuulkaan burbur xoogan ayaa soo gaaray mudadii uu dalka ku jiray dagaalada sokeeye waxaa wax ku baran doona carruurta degmada Cadale, waxaa ay heli doonaan waxbarasho lacag la’aan ah “ayuu Kusimaha Wasiirka Howlaha ee Hirshabeelle ku soo xiray hadalkiisa.
Mashaariicdaan ay Wasaaradda Howlaha guud iyo Guriyeenta maamulka Hir-shabeelle ka sameynayaan degmada Caddelle iyo dagmooyinka kale ee gobolka Shabeellaha dhexe ayaa waxaa ay qeyb ka yihiin howlaha horumarinta iyo adeegyada bulshada ee maamulka uu sameynayo..
W/D;Cabdullaahi Qorshe
