Mas’uuliyiin ka socotay Safaarada Ingiriiska ee Soomaaliya iyo Maamulka Degmada Xamar Jajab ayaa maanta ka qaybgalay munaasabad lagu daah furayay mashruuca dariseynta kaas oo lagu qabtay xarunta Degmadaasi.
Munaasabadan lagu daah furayay mashruuca deriseynta oo maanta laga hir geliyay degmada Xamar Jajab ee gobolka banaadir waxaa kaloo ka qeyb galay qeybaha kala duwan ee bulshada, waxaana fanaaniinta Kooxda Heegan ee ciidanka Booliska ay goobta ku soo bandhigeen sugaan ka turjumaysa muhiimadda deriseynta uu u leeyahay shacabka Soomaaliyeed.
Guddoomiye ku-xigeenka dhinaca arrimaha bulshada ee Degmada Xamar Jajab Axmed Cabdullaahi Samow ayaa sheegay in mashruucaan dersieynta ay muhiimad gaar ah u leedahay Shacabka Degmada.
“Mashruucaan dersieynta waxa uu waxyaabo badan ka tari doonaa waxyaabo ay ka mid yihiin isdhex galka bulshada iyo in la ogaado dadka kuwa wanaagsan iyo kuwa xun xun, in ammaanka uu ka qeyb qaato iyo in bulshada degmada qofka ku soo kordha la ogaado”.
Mr Steven oo ka socday Safaaradda Dowladda Ingiriiska ee Soomaaliya ayaa sheegay in hadii ay bulshada isku xirnaanto ay horumar badan gaari karaan, isagoo xusay in safaaradda ingiriiska ee Soomaaliya ay ka shaqeyn doonto horumarka degmooyinka gobolka banaadir.
“Waxaan aad ugu faraxsanahay inaan halkaan joogo oo aan dhex joogo shacab intaan la eg oo horumarkooda ka hadlaya, waxaan sidoo kae aan soo dhoweyneynaa in howlaha maamulada degmooyinka iyo kan gobolka banaadirba ay wadaan’’ ayuu yiri Steven.
Taliyaha Saldhiga Degmada Xamar Jajab Iftin Cumar Adeer ayaa sheegtay in bulshada degmada looga baahanyahay in ay gacmaha is qabsadaan oo ay ciidanka gacan ku siiyaan sugidda amniga, ayna ku soo wargeliyaan cidkasta oo caqabad ku ah Nabadgelyadooda.
Guddoomiyaha Degmada Xamar Jajab Axmed Cusmaan Dhoore ayaa sheegay in mashruucaan deriseynta uu ka socdo guud ahaan degmooyinka gobolka banaadir, loona baahanyahay shacabka degmada inay u midoobaan sidii ay uga wada shaqeyn lahaayeen xoojinta nabadda.
“Deriseynta micnaheeda waxa uu yahay wadanimo, waa in qofka uu muwaadin noqdo, waa intaas hadii aad dersikaaga iyo adiga aad iska war qabtaan, waxaa meeshaas ka dhalanayso ammaanka iyo guud ahaan degmada laga war qabo taasina horumarkiina ayaa ku jir” ayuu yiri Guddoomiyaha Degmada.
