Kulankaan oo uu shir guddoominayay Guddoomiye ku xigeynka Gobolka Mudug ee Galmudug Axmed Maxamed Shire Qoodaar sidoo kalana ay goob joog ka ahaayeen duqa Dagmada Gaalkacyo Cabdiraxmaan Sheekh Xasan iyo xubno ka tirsan Golaha Deegaanka Dagmada Gaalkacyo ayaa Maanta magaalada Gaalkacyo ku dhaxmaray Saraakiil ka socatay Hay’adda W.F.P ee Qaramada midoobay, Mas’uuliyiinta Gobalka iyo kuwa Dagmada Gaalkacyo.
Xubnahaan ayaa waxaa hogaaminayay isku xiraha gurmadka deg deg ah ee Hay’adda W.F.P. waxaana labada dhinac ay kaga wada hadleen arrimo badan oo ay ka mid yihiin xoojinta gurmadka la gaarsiinayo barakacayaasha ku sugan deegaannada Gobalka Mudug iyo xeryaha ay soo magansadeen Qoysaska Abaaraha ku soo xoola beelay ee ku yaala duleedka magaalada Gaalkacyo.
Kulanka kadib ayaa saraakiishii ka socatay W.F.P iyo Mas’uuliyiintii maamulku waxa ay kormeer ku tageen qaar ka mid ah kaamamka ay ku nool yihiin barakacyaashii u danbeeyay ee soo miciin biday Gaalkacyo.
Guddoomiye ku-xigeenka Gobalka Axmed Maxamed Shire iyo Duqa Degmada Gaalkacyo Cabdiraxmaan Sheekh Xasan ayaa uga mahad celiyay Hay’adda W.F.P barnaamijka kaalmeynta dadka barakacyaasha ah ee xiligaan Adeg la daalaadhacaya abaaraha ka jira
guud ahaan deegaanada Gobalka Mudug.
