Mas’uuliyiinta Safaaradda Yemen ee Soomaaliya oo maanta kulan qado ah u sameeyay hay’adaha samafalka ayaa shacabka Soomaaliyeed iyo hay’adaha gar gaarka qaabilsan uga mahadceliyay gurmadkii ay u fidiyeen Walaalahood Yemeniyiinta ah ee ka soo cararay dagaalada ka taagan Yemen.
Qunsulka Yemen ee Soomaaliya Mansuur Cali Rayaasha Al Cimraani oo ka hadlay goobta ayaa ka mahadceliyay kaalinta ay ka geysteen shacabka Soomaaliyeed iyo qaar ka mid ah hay’adaha gar gaarka oo gurmad u fidiyay Qaxootiga Yemeniyiinta ah ee ka soo qaxay rabshadaha ka soconaya dalka Yemen.
Guddoomiyaha Mu’asasada SAFA Sheekh Maxamed Muuse Maxamed iyo Guddoomiyaha Hay’adda horumarinta bulshada Sheekh Cumar Axmed Sheekh Cusman ayaa labaduba tilmaamay in Ummadda Soomaaliyeed ay waajib ka saarantahay caawinta walaalahood ka soo cararay dagaallada dalka Yemen.
Xildhibaan Ibraahim Saalax Deyfullaah oo ka hadlay kulanka ayaa u mahadceliyay Walaalaha Soomaaliyeed iyo hay’adaha garka gacanta ay ka geysteen u gar gaaridda dadka Yamaniyiinta ah ee ka soo qaxay dagaalada ka soconaya Dalka Yemen, waxaana uu hay’adaha ka codsaday in ay sii labo jibaaraan wax u qabashada walaalahood Yemen ka soo cararaya.
