Agaasimaha Guud ee Wasaaradda batroolka ee Xukuumadda Soomaaliya mudane Maxamed Xaashi Carabeey ayaa bogaadiyay kaalinta shacabka deegaanka Shabeellow ee Gobolka Mudug ka geysteen inay iska caabiyaan oo ay ka dhiidhiyaan maleeshiyaad ka tirsn Al-Shabaab oo doonayay inay baad ka qaadaan dadka deegaanka, kuwaasi oo dadka deegaanka ay jab xoogan u geysteen
Agaasimaha oo wareysi gaar ah siiyay Radio Muqdisho ayaa sheegay in shacabka degan deegaannada Galmudug ay yihiin kuwa ay ka go’antahay inay iska celiyaan dhagarqabayaasha Al-Shabaab, isagoo maamulka Galmudug ku booriyay in dadka deegaanka gacan lagu siiyo sidii guud ahaan Al-Shabaab looga cirib tiri lahaa guud ahaan dalka gaar ahaan deegaannada Galmudug.
Maxamed Xaashi Carabeey Agaasimaha Guud ee Wasaaradda batroolka ee Xukuumadda Soomaaliya ayaa mar uu ka hadlayay doorka dhallinyarada ee hogaaminta dalka waxa uu tilmaamay in dhallnyarada Soomaaliyeed ay xilligan heystaan fursad aad u wanaagsan oo ku muujin karaan kaalinta ay ku leeyihiin dib u dhiska dowladnmada.
“Waxaan u hambalyaynayaa dhallinyarada Soomaaliyeed, runtii dhallinyarada waa awoodda maanta dunida ay ku faanto, dalkeena xornimadiisa dhallinyaro ayaa gacan ka geystay, waxana dhallinta ku boorinayaa in quwaddooda ay uga faa’iideystaan dhanka wanaagsan oo ay ka shaqeeyaan horumarinta dalkooda” ayuu yiri Agaasime Maxamed Xaashi
