222-Milyan Yuro oo ah Heshees layaab leh oo wali aanan ka dhicin Kubadda Cagta ayay Naadiga Paris Saint-Germain kula wareegtay Neymar Jr oo ka mid ah xidigaha Dunida ugu fiican xiligaan. Ciyaaryahankaan ayaa hadda ka wareegay Camp Nou waxaana lagu soo bandhigay magaalada Paris ee Caasimadda Waddanka Faransiiska, iyadoo Naadiga PSG ay ku Abaal marisay Numberka 10-aad.
Jr ka hor, heshiisyada Aduunyada la yaabka ku ahaa ee dhacay waxaa ka mid ahaa kuwa lagula wareegay ciyaartoyda Paul Pogba iyo Gareth Bale kuwaas oo Naadiyadooda ay ku qaateen ilaa iyo 100-Milyan oo Yuro, laakiin Dhacdooyinkaasi waxaa meesha ka saaraya Taariikhdaan cusub oo ay samaysay Kooxda reer Faransa ee PSG.
Taageerayaasha iyo Bahwaynta Jecel kubadda Cagta oo Sanadihii ugu danbeeyay sii batay ayaa keentay in Kooxaha iyo Milkiilayaashaba ay helaan Suuq wayn oo lacago badan ka soo galaan, waxaana Dhacda in marka hal ciyaaryahan ay ku soo iibsadaan Lacag Waali ah in wax ka badan Lacagta ka baxday ay ka helaan iibsiga Fanaanada Kooxda iyo Xayisiinta ay Naadigu Samayso.
-In Heshiiska hal ciyaaryahan lagu Burburiyo 222-Milyan Yuro waxay ka dhigantahay in kubadda Cagta ay dhammaanteed isku sii badalayso Ganacsi iyo in Lacag waali ah laga sameeyo.
-In Neymar Jr uu helo Naadi uu isagu Hoggaaminayo sida PSG oo kale ayaa waxay kaga dhigantahay inuu noqon karo xidig wayn oo la tartama Saaxiibkiisii hore ee Messi iyo Ronaldo, si uu u noqdo Xidiga Aduunyada ugu Fiican.
-In Jr uu ka hoos baxo Messi waxay wado wayn u sii furi kartaa xidiga ay haatan qariyeen Ronaldo iyo Messi ee kala ah Gareth Bale iyo L. Suarez, kuwaas oo haatan shaqada ay qabtaan ay ku Abaal leeyihiin xidigaha 10-kii Sano ee la soo dhaafay heestay Dunidaan.
-In Xidigaan oo kale uu ku biiro Horyaalka Faransiiska ayaa waxay micno wayn u samaynaysaa xiisaha iyo magaca Horyaalka Faransiiska, taasi oo sidoo kale dhiiragalin doonta in xidigo waawayn oo markii hore ku taami jiray Horyaalo gaar ah ay haatan u weecdaan dhanka Faransiiska.
-In Barcelona ay sanadkaan la soo shirtagto Koox uu ka maqanyahay Jr ayaa waxay Farxad galin kartaa Kooxda ay sida wayn u xifaaltamaan ee Real Madrid maadaama Neymar loo arkayay in Barcelona uu u yahay mashinka labaad ee Dhaqaajinayay marka laga soo tago Messi.
Si kastaba waxaan rajaynaynaa in Sanadkaan la daawado ciyaaraha Kubadda Cagta iyadoo uusan jirin Tartankii Laba Geesoodka ahaa ee u dhaxeeyay Ronaldo iyo Messi, waxaana sidoo kale la filayaa inuu bilowdo Tartan Saddex Geesood ah maadaama uu ku soo biirayo Neymar Jr.
W/Q Mohamed Kaafi Sheekh Abuukar
