18-kii bishaan waxaa Is rasaaseyn ka bilaabatay xarunta ay ka dhaceysay doorashada Aqalka Hoose ee magaalada Jowhar, taasi oo ka dambeysay buuq ka dhashay doorashada Aqalka Hoose oo Kursiga Gugundhabe, gaar ahaan Jufada Jidle ay ku tartamayeen illaa saddex musharax muran hareeyay dhanka ergada ah.
Kursigan ayaa waxaa ku tartamayay Wasiirka Dhalinyarada iyo Isboortiga Maxamed Xasan Nuur, Axmed Sheekh Nuur Foodcadde iyo Nuur Bocor.
Wareega hore ayaa mas’uuliyiinta waxa ay isku mari waayeen xagga dhibcaha laga rabay in uu qofkasta la yimaado oo sida sharciga qabo ay tahay 26 dhibcood, maadaama ay ergadu tahay 51 qof, waxaana loo baahday in la sameeyo wareeg labaad, maadaama ay isku soo hareen labo musharax, loona baahday in lagu kala saaro wareegga xiga, iyadoo intii lagu jiray arrintaasi ay madasha ka dhalatay buuq ay sameeyeen qaar ka mid ah ergada musharixiinta u codeyneysay.
Ilo wareedyo lagu kalsoonyahay ayaa ku soo waramaya in Wasiirka Dhalinyarada iyo cayaaraha ee Xukuumadda Soomaaliya Mudane Maxamed Cabdullaahi Xasan Nuux uusan waxba kala socon shilkii ka dhacay 18-kii bishan afaafka hore ee Hoolka doorashada aqalka Hoose ee Jowhar, isla markaana uu isagu ku jiray gudaha Hoolka, balse markii dambe lagu wargeliyay sida ay wax u dhaceen.
Wararka ayaa tillmaaya Wasiirka ilaadiisa oo sagootinayay ergada ay la kulmeen tacshiirad kaga timid kooxo hubeysan, isla markaana aysan iyagu ka warqabin sababta ka dambeysay in rasaasta lala dhaco.
“Waxaa jirtay in doorashada dadka codeynayay ay calaamad u yeeleen warqado gaar ah, taas ayaa ka dhalatay buuq oo ay dagaalameen ergada dhexdooda ah, dibada ayaa loo soo saaray markii hore, korantadii ayaa goobta ka tegtay, kadib ergada gudaha ayaa lagu soo celiyay, waxaaana laga qaaday kaararkii ay wateen, iyagoo lagu armay inay baxaan” ayuu yiri goob jooge xarunta ku sugnaa oo hadalkiisa ku daray “Wiilal la socday Wasiirka dhalinyarada ayaa ergada sii marsiinayay jidka, taasi oo kooxo hubeysan ay durbadiiba xabadda ku bilaabeen Ilalada Wasiirka oo u heystay in Wasiir Nuux uu la socday, balse isagu uu gudaha hoolka ku jiray oo, sidaas ayayna wax ku dhaceen oo uu shilka ku bilowday”.
Dowlad goboleedka Hirshabeelle ayaa ku guuleystay inay xabsiga dhigaan kooxihii rasaasta bilabay.
Sida laga wada ogsoonyahay musharixiinta ayaa ka reeban in iyaga iyo Ilaaladooda ay hubka la galan goobta doorashada, waxaana shilkaasi ku dhaawacmay 3 qof oo uu ku jiro wiil uu dhalay Madaxweyne ku-xigeenka Dowlad Goboleedka Hirshabeelle.
Guddoomiyaha Guddiga Hirgelinta doorashooyinka dadban, Abuukaate Cumar Dhagey oo ay la socdaan, guddoomiyaha guddiga Amniga doorashooyinka ahna taliyaha ciidamada Booliska Soomaaliyeed, Sareeyo Gaas Maxamed Sheekh Xasan Xaamuud iyo taliyaha hey’adda Nabad-sugidda, Jeneraal Cabdullaahi Maxamuud Caafoow ayaa socdaal gaaban u tegay magaalada Jowhar, kaasi oo la xiriirtay shaqaaqadii ka dhacdey magaaladaasi, xili ay socotay doorashada mudaneyaal aqalka hoose u tartameysay, kuwaasi oo kulamo gaar gaar ah la qaatay dhinacyada iyo guddiga doorashooyinka qaabilsan.
Wafdiga ayaa xalay dib ugu soo laabtay magaalada Muqdisho, kuwaasi oo weli war cad ka soo saaran shilka ka dhacay Jowhar.
