Maxkamad ku taalla magaalada New York ee dalka Mareykanka ayaa wiil Soomaali ah ku xukuntay sagaal sano oo xarig ah kaddib markii uu Maxkamadda ka hor qirtay in uu ku biiray kooxda Al-Shabaab.
Xukunka Mahdi Xaashi oo 26 jir ah ayaa yimid markii uu bishii May ee sannadkii hore qirtay in uu taageero siiyey Al-Shabaab, isla markaana uu ku biiray maleeshiyaadka Al-Shabaab.
Toddobaakdii hore laba nin oo heysta dhalashada Sweden oo Mahdi lala soo dacweeyey ayaa iyaguna la xukumay. . Cali Yaasiin Axmed iyo Maxamed Yuusuf ayaa lagu ridday min 11 sano oo xabsi ah.
Xeer ilaaliyaasha Mareykanka ayaa sheegay in intii u dhexeysay bilihii Decemberr 2008 ilaa August 2012 ay Mahdi, Cali Yaasiin iyo Maxamed Yuusuf ka tageen Britain iyo Sweden, una safreen Soomaaliya, markaasoo ay ku biireen Al-Shabaab, waxaana markii dambe lagu qabtay bariga Afrika.
Yuusuf iyo Axmed ayaa la sheegay in ay u dagaallameen kooxda, hase yeeshee xeer ilaaliyeyaashu waxay sheegeen in aanay aheyn cadeymo muujinayo in Xaashi uu Al-Shabaab dagaal kala qeybgalay.
Saddexda nin ayaa lagu xiray dalka Jabuuti bishii August 2012, kaddib markii ay ka soo tallaabeen xadka Soomaaliya, iyagoo doonayey in ay u gudbaan Yemen si ay ugu biiraan Al-Qaacida sida ay dacwoogayaasha sheegeen.
