Munaasabad lagu soo dhaweynayay dib u magacaabida wasiirka maaliyadda xukuumadda federaalka Soomaaliya mudane C/raxmaan Ducaale Beyle ayaa lagu qabtay magaalada Muqdisho ee caasimadda dalka, waxaana kasoo qeyb galay haween,culimaa’udiin,salaadiin iyo qeybaha kala duwan ee bulshada.
Dr Kheyriye Maxamed Cali oo ka mid aheyd qaban qaabiyeyaasha munaasabadda ayaa madaxda Qaranka uga mahadcelisay fursada ay markale siiyeen wasiir Beyle si uu ugu adeego dalka.
Diiriye Geelle Cali iyo Xuseen Nuur oo kamid ah salaadiinta Soomaaliyeed ayaa sheegay in wasiir Dr. Cabdiraxmaan Ducaalle Beyle uu dalka shaqo wanaagsan usoo qabtay muddadii uu xilka hayay, iyagoo markale ugu hambalyeeyay mas’uuliyadda loo igmaday.
Wasiirka maaliyadda xukuumadda federaalka Soomaaliya Dr. C/raxmaan Ducaale Beyle ayaa ka mid ah wasiirrada dib loogu magacaabay wasaaradihi ay joogeen, kaddib markii golaha shacabku uu kalsoonida kala laabtay xukuumaddii uu hoggaaminayay ra’iisul wasaarihii hore ee Soomaaliya Xasan Cali Kheyre 25-kii bishii Luulyo ee sannadkaan.
