Deeqdan oo isugu jirta qaybaha kala duwan ee raashinka la quuto looguna talagaley dadka ay abaaruhu saameeyeen ee ku nool deegaano hoostaga Magaalada Dhuusamareeb ee Caasimada Galmudug ayaa maanta la gaarsiiyey in ka badan konton qoys oo ah kuwo abaartu si gaar ah saameyn ugu reebtay.
Raashinkan ayuu ku deeqay muwaadin Soomaaliyeed oo lagu magacaabo Abuukar Maxamed Jimcaale oo isku howley in biyo dhaamin iyo taakulo raashin in uu si iskii ah ula garab istaago reer guuraaga abaartu saameysay ee ku nool deegaanada Galmudug sida uu sheegey Nuune Cabdulaahi Cabdi oo wakiil uga ahaa muwaadinkaasi qaybinta raashinkan iyadoo lagu wareejiyay dadkii mudnaa.
Qaar kamid ah dadka taakuladan la gaarsiiyey oo ka mahad celiyey deeqda uga timid Muwaadinka Soomaaliyeed Abuukar Maxamed Jimcaale ayaa ka waramay duruufaha xiligan ku heysta deegaanka Beer-Cabdi Faarax oo ay ku nool yihiin kuna wajahayaan duruufa ay ka mid yihiin biyo yari iyo xoolaha oo aan heysanin daaq ku filan.
