Guddoomiyaha Degmada Wadajir ee gobalka Banaadir Axmed Cabdulle Afrax oo ay wehliyaan mas’uuliyiin ka tirsan maamulka Degmada ayaa maanta kormeer howleed ku tegay olole Nadaafaded oo bulshada degmada ay ka sameeysay wadooyinka Jaala Siyaad ee hormarta suuqa Madiina iyo wadada isku xirta ex-koontarool Afgooye iyo Banaadir.
Ururka haweenka Degmada ayaa si weyn uga qeyb qaadanayey Nadaafada wadooyinkasi kaas oo loogu nadiifinayey qashinka iyo wasaqda lasoo dhigay hareera wadooyinka, si loo soo celiyo bilicda caasimadda.
Guddoomiyaha Degmada Wadajir Axmed Cabdulle Afrax ayaa ugu baaqay ganacsatada degmada inay mas’uuliyad iska saaraan nadiifinta waddooyinka hortooda ah, maadaama ay iyagu ku ganacsanayaan.
Guddoomiyaha gobalka banaadir ahna Duqa magaalada Muqdisho Mudane Xasan Maxamed Xuseen “Muungaab” ayaa dhawan ku dhawaaqay in tartan adag la galin doono degmooyinka gobalka banaadir, tartankaasi oo la xariira Nadaafada iyo bilic soo celinta caasimadda, iyadoo Degmadii ku guuleysata lagu doonsiindo abaal marin.
