Iyadoo dhawaan lagu wado in uu furmo kalfadhiga Lixaad ee baarlamaanka Federaalka ah ee Soomaaliya ayaa maanta xarunta Golaha Shacabka ee magaalada Muqdisho laga bilaabay olole nadaafadeed oo sare loogu qaadayo bilicda xarunta.
Dadweyne aad u fara badan oo ka kala yimid xaafadaha ay ka koobantahay degmada Howlwadaag iyo qaar ka mid ah shaqaalaha Nadaafadda dowladda Hoose ee Xamar ayaa la arkayay iyaga oo qaadaya qashinka, waxaana howshaasi sidoo kale ka qeyb qaadanayay gaadiidka dowladda hoose ee Xamar.
Guddoomiyaha Degmada Howlwadaag Axmed Nuur Cabdi Siyaasad oo ugu horeyn la hadlay Warbaahinta Qaranka ayaa ka warbixiyay sida ay u socdaan ololaha nadaafadeed.
“Ololahan waxa ay tahay sidii aan qashinka uga qaadi lahayn xarunta golaha shacabka, runtii shaqaalaha baarlaamanka ayaa gacan nagu siiyay, howshana waan sii joogteyn doonaa, haddii uu Alle idmo” ayuu yiir
Afhayeenka Mamulka Gobolka Banaadir Cabdifaaax Cumar Xalane oo isna La Hadley Warbaahinta ayaa sheegay in Maamulka Gobalka ay ka go’antahay xoojinta ololaha nadaafadda ee caasimadda
Afhayeenka ayaa yiri: “Howshan looma kala harin, shaqaalaha Nadaafadda waan uga mahadcelineynaa, runtii maamulka waa ay ka go’antahay dar dargelinta olalaha nadaafadda ee caasimadda”.
Maxamed Cabdullaahi Ciyow oo ah Xoghaye ku-xigeenka Golaha shacabka ayaa maamulka Gobolka Banaadir uga mahadceliyay howlaha nadaafadeed ee ay ka bilaabeen xarunta Golaha Shacabka
“Howshan laga qabtay xarunta golaha shacabka aad ayaan uga mahadcelineynaa, runtii waxaan qirayaa in Maamulka Gobolka uu qeyb weyn ka qaatay kaalintii Nadaafadda ee kaga aadaneyd degmada Howlwadaag oo xarunta Golaha Shacabka ay qeyb ka tahay” ayuu yiri Maxamed Cabdullaahi Ciyow.
