Dawlad-gobolleedyada Puntland iyo Galmudug ayaa boggaadiyay doorka taageerrada Bulshada ee mashruuca SAGAL.
Barnaamijkan oo qeyb ka ah Siyaasadda Ilaalinta Bulshada ee Wasaaradda Shaqada iyo Arrimaha Bulshada ,wuxuu lacag caddaan ah ku taageera Dadka u nugul xaaladaha bani’aadanimo gaar ahaan, Hooyooyinka uurka leh, Dadka da’ada ah iyo kuwa baahiyaha gaarka ah qaba.
Wasiirka Shaqada ee Puntland , Mudane Cabdiraxmaan Caydiid Ibraahim ayaa ku tilmaamay mashruucan ay hoggaaminayso Dawladda inuu door ka qaadanayo ka hortagga xaaladaha degdegga ah ee Bulshada , gaar ahaan kuwa nugul , kaddib markii uu xafiiskiisa ku qaabbilay saraakiil ka tirsan mashruuca oo sidoo kale la kulmay duqa caasimadda Garoowe , Mudane Axmed Siciid Muuse .
Dhinaca kale , madaxa mashruuca SAGAL, Maryan Maxamed Kaahin iyo saraakiil kale oo ka tirsan mashruuca ayaa booqday degmada Dhuusamareeb ee caasimadda Galmudug , halkaa oo ay kula kulmeen wasiir ku-xigeenka Wasaaradda Shaqada Galmudug , Maxamed Nuur Diini iyo duqa degmada Dhuusamareeb, Macalin Cabdiraxmaan Geedaqoroow.
Ujeeddada socdaalka ay xubnahan ku tageen Garoowe iyo Dhuusamareeb ayaa la xiriirtay daadejinta mashruuca SAGAL, si loo xoojiyo iskaashiga , loona guda-galo fulinta wajiga kale ee mashruuca oo taageerraya Dadka baahiyaha gaarka ah qaba.
