Hay’adda shaqaallaha rayidka ah ee Dowlad goboleedka Puntland ayaa maanta qaaday Imtixaan ay u fariisteen 80 qof oo isugu jira 20 Rag iyo 60 Dumar ah, kuwaas oo u tartamayey boosaska kaydinta xogta dowladda oo loo qaadanay 7 kamid ah hay’adaha ee ka faa’iideysanaya mashruuca tayaynta iyo shaqaalaysiinta ee uu Baniga adduunku ka caawinayo Puntland.
Imtixaanka ayaa waxaa lagu qabtay Xarunta Library-ga, iyadoona loosoo diyaariyey hab casri ah oo ka beddelan qaabkii hore ee loo diyaarin jirey imtixaanka si loo ilaaliyo hufnaanta imtixaanka isla markaana loo dhowro kalsoonida tartameyaasha iyo guud ahaan shacabka Soomaaliyeed.
Qorshaha loo qaadanayo shaqaalahaan cusub ayaa ah sidii loo heli lahaa shaqaale xirfad iyo aqoon u leh hannaanka kaydinta xogta ama arkiifiyada si loo tayeeyo waxna looga beddelo qaabkii hore ee loo kaydin jirey xogta Maamulka.
Shaqaalahaan cusub ayaa markii la qaato waxa ay ka kala hawl-geleyaan xarumaha Wasaaradaha Qorshaynta, Beeraha, Xannaanada Xoolaha, Kalluumaysiga, shaqada iyo shaqaala, Bangiga iyo hay’adda shaqaalaha rayidka ah ee dawlad Goboleedka Puntland.
