Qabow xad dhaaf ah oo horey loo saadaaliyay ayaa maanta(Talaado) aad looga dareemay meelo ka mid ah Mareykanka oo Minnesota ay ku jirto,magaalooyinka gobolka Minnesota, gaar ahaan magaalooyinka mataanaha, Saint Paul iyo Minneapolis ayaa heer kulka hawada maanta waxaa uu gaaray -29 F ayada oo la filayo in uu intaas hoos uga dhaco.
Maalinta arbacada ayaa waxaa sidoo kale la saadaalinayaa in heerkulka hawada ee magaalooyinkaasi uu hoos uga dhacayo -55 F,Iskuulada gobolka oo dhan ayaa xiran muddolaba maalmood ah, waxaana ay sii xirnaan doonaa ilaa maalinta arbacada ah. Sidoo kale, jaamacadihii gobolka ayaa waxbarashadii la hakiyay.
Adeegii boostada ee dalka Mareykanka ayaa hakad la geliyay gobolada Minnesota, Iowa, Western Wisconsin iyo Western Illinois,Qabowga daran aawadii ayaa shirkadda tagaasida ee Lyft ku yaboohday adeeg bilaash ah xilliga dhaxantu daran tahay.
Si loo yareeyo khataraha ka dhalan kara qabowga daran ayaa waxaa dadka loo sheegay in ay xirtaan koofiyadaha qabowga iyo gacmo gashiga qabowga,Qabowga saa’idka ah oo ay la socoto dabeysha xoogan ee ku socota xawaare said ah ayaa waxaa laga qaadaa xanuun lagu macaabo frostbites( waa xanuun ku dhaca faraha, dhegaha iyo sanka marka xubnahaasi ay daqiiqado ay ku dhacaan qabowga iyo dabaysha) sida ay dhakhaatiirtu sheegeen.
Waxaa maanta gobolka oo dhan laga dareemayay feejignaan dheeri ah, ayada oo dadku ku yaraayeen goobaha ganacsiga, ayaga oo sidoo kale baajinayay balamada ay la lahaayeen dhakhaatiirta.
W/Q: Suldaan (Mohamed Osman (NewYork).
