Imaan Maxamed Yusuf Cali Imaan ayaa maanta kulan qado ah ugu sameeyey Muqdisho Boqor Burhaan Boqor Muuse iyo Ugaas Maxamed Ugaas Xaashi oo dhowrkii maalmood ee la soo dhaafay ku sugnaa Muqdisho, waxaana kulanka qadada uu ahaa mid ku salaysan dhaqan, iyadoo alaabta wax lagu cunayey iyo qaabka loo diyaariyey ay ka muuqatay in la joogo baadiyiihi.
Kulanka qadada waxaa ka qeyb galay Ugaas Maxamuud Cali Ugaas, Caaqilo, Nabadoono, Wasiiro, Siyaasiyiin iyo Xildhibaano, Haween, Ganacsato, Guddoomiyeyaasha Degmooyina gobolka Banaadir iyo marti sharaf kale
Ugaaska Maxamuud Cali Ugaas oo xaflada ka hadlay ayaa sheegay in, isagoo in uu aad ugu faraxsan yahay in maanta qado Sharaf balaaran ay ugu sameeyaan Boqor Burhaan Boqor Muuse oo aad looga qadariyo gayiga Soomaaliyeed.
Ugaas Maxamed Ugaas Xaashi oo goobta ka hadlay ayaa aad ugu mahdiyey sida qadarinta leh ee ay maanta u sooreen duubabka Muqdisho, isagoo sheegay arinkaan inuu muujinayo sida ay dhaqanka u ilaaliyaan.
Boqor Burhaan Boqor Muuse oo goobta ka jeediyey khudbad dheer oo isugu jirtay taariikh hore iyo sidii hada Soomaaliya ay isugu soo dhawaanayso ayaa sheegay iney isaga iyo salaadiinta Soomaaliyeed ay ka balameen sidii midnimada Soomaaliya loo soo celin lahaa.
Boqorka oo ka hadlay safarkii dheeraa uu ku tagay dalka dibadiisa ayaa ku tilmaamay in safarkaas uu qayb ka ahaa sidii Soomaali laysugu keeni lahaa, wuxuuna boqorku sheegay in dadka qurb joogta ah ay yihiin caqligii dalka, kuna booriyey inay dalka dib ugu soo laabtaan.
Imaan Maxamed Yuusuf Imaan Cali oo xaflada soo xiray ayaa si qoto dheer ugu duceeyey dadkii meesha ka soo qayb galay, isagoo sheegay iney tagi doonaan gobolada Soomaalida oo dhan, si uu u muujiyo isu keenidda Soomaalida, wuxuuna Imaanku ilaahay uga baryey shacabka Soomaaliyeed in bogooda burcad isu mariyo, dhanka kale Imaamka ayaa gudoonsiiyey Hadiyado Ugaas Maxamed Ugaas Xaashi iyo Boqor Burhaan Boqor Muuse.
