Ugu yaraan shan qof ayaa dhimatay todoba kalena waa ay ku dhaawacmeen kadib markii gaari waxyaabaha qarxa laga soo buuxiyay la dhigay goob ay dad shacabka ah ku qaxweynayeen oo ku taala isgoyska Jubba ee magaalada Muqdisho.
Wariye Maxamed Cali Cumar Jubba oo ka mid ah dadkii gaaray goobta ay wax ka dhaceen ayaa ku soo waramay in gaariga uu ahaa Nooha, la dhigay isgoyska, kaasi sababay dhimasho iyo dhaawac, waxaana dadkii ku dhaawacmay falkaasi loola cararay goobaha caafimaadka.
Ciidamada amniga oo gaaray goobta ayaa isku gadaamay halka uu qaraxu ka dhacay, kuwaasi oo gacan ka geystay sidii loo qaadi lahaa dadkii falkaasi ku waxyeeloobay.
Saraakiisha goobta ku sugan ayaa tilmaamay inay wadaan baaritaano, isla markaana ay saxaafadda la wadaagi doonaan qasaaraha dhabta ah ee ka dhashay qaraxa lala eegtay dad rayid ah oo ku qaxweynayay isgoyska Jubba.
