Xilli ay isa soo tarayaan qoysaska naftooda oo qura kala soo cararaya dhibaatooyinka dilka iyo dhaca xaq darada ah ee ay maleeshiyaada argagixisada ka geysanayaan meelaha far ku tiriska ah ee ay kaga sugan yihiin Al-Shabaab deegaanada Galmudug ayaa waxaa ciidanka Qaranka Soomaaliyeed ee DANAB 21aad waxa ay gaarsiyeen gurmad ay ku caawinayaan qoysaskaasi qaarkood kuwaasi oo soo gaaray deegaanada Ceel huur iyo Qaran raaw ee Bariga Gobalka Mudug, iyagoo ay wajiyadooda ka muuqdaan dhibaatooyinkii ay kala kulmeen kooxda sharwadayaashaa ee Al-Shabaab.
Taliyaha ciidan DANAB 21aad Cabdicasiis Cabdullaahi Xogolof oo la hadlay Warbaahinta Qaranka ayaa sheegay in kaalmadan ay ugu talageen shacabka, isla markaana ay jiraan qorshayaal ku aadan sidii kooxdaasi loo soo afjari lahaa balse shacabka looga baahan yahay in ay la shaqeeyaan ciidamada kala duwan ee Qaranka iyo kuwa dowlad Gobaleedka una istaagaan la dagaallanka kooxda naf la caarigaa ee haraadigoodu ku dhuumaaleysanayo dhulka howdkaa ee ku dhaw dhaw Degmada Xarar Dheere.
Qaar ka mid ah qoysaskii deeqda la gaarsiiyay ayaa ka mahad celiyay, iyagoo xusay in ay u tahay markii ugu horeysay oo ay arkaan ciidan bulshadooda la qeyb sanaya dhibaatada heysata.
Ciidanka Xoogga Dalka Soomaaliyeed ayaa mudooyinkii u dambeeyay waday howlgalo ka dhan ah Al-Shabaab taasoo suurta gelisay in deegaanno fara badan oo horay kooxdaasi ugu sugnaayeen ay la wareegaan Ciidamada Qaranka Soomaaliya, gaar ahaan kuwa Xoogga Dalka oo iyagu ku sugan guud ahaan Goballada Dalka.
Waxaa Qoray Wariye C/risaaq Maxamed Axmed (Galkacyo)
