Ra’iisul Wasaaraha xukuumadda federaalka Soomaaliya, mudane Xasan Cali Khayre, ayaa maanta daah-furay shir looga hadlayo meel marinta Istaraatiijiyadda horumarinta xannaanada xoolaha dalka.
Ra’iisul Wasaaraha oo howl wadeennada Wasaaradda Xannaanada xoolaha uga mahad-celiyay dadaalka ay geliyeen sameynta istaraatiijiyadda ayaa sheegay in horumarinta iyo xanaanaynta xoolaha ay qayb muhiim ah ka yihiin hagaajinta dhaqaalaha dalka iyo yaraynta saboolnimada.
Shirka lagu meel marinayo istaraatiijiyadda xanaanada xoolaha dalka oo socon doona mudda sedax maalin ah ayaa waxaa kasoo qayb galay Wasiirrada Xanaanada xoolaha ee dowlad gobaleedyada, maamulka gobalka Banaadir, Wakiilo ka socday beesha caalamka iyo mas’uuliyiin kale.
Madaxa Bankiga Adduunka ee Soomaaliya Hugh Riddell iyo wakiilka FAO ee Soomaaliya Sergi Tissot oo madasha ka hadlay ayaa si wadajira u sheegay In loo baahanyahay in si wadajira looga wada shaqeeyo horumarinta xoolaha, iyaguna ay diyaar u yihiin sidii ay uga qeyb gali lahaayeyn horumarinta xoolaha Soomaaliya
Wasiirka Xanaanada Xoolaha Soomaaliya Mudane Xuseen Maxamud Sheekh Xuseen oo munaasabadda ka hadlay ayaa sheegay in barnaamijkan si wada jir ah loo soo bilaabay bishii october ee sanadkii 2018-ka, isagoo intaa ku daray in Wasaaraddu ay hadda heer gabo gabo ah u marayo diyaarinta dokuminti ku saabsan ka hortagga abaaraha iyo dhibaatooyinka ka dhasha.
“Waxaa lagu beeray wadanka, gaar ahaan caasimadaha dowlad Goboleedyada iyo Gobolka Banaadir 30-kun oo geed, iyadoo la hiigsanayo in la beero dhir gaareysa hal miyan oo geed dhamaadka sanadka 2020-ka, waxaa kaloo la hirgeliyay lix xarumood oo lagu kobciyo dhirta, dhanka kale waxaa cuduro laga talaalay 28 milyan oo neef” ayuu yiri Wasiirka Xanaanada Xoolaha Soomaaliya.
Istaraatiijiyadda Xanaanada Xoolaha dalka oo ay diyaarisay wasaaradda xannaanada xoolaha oo la tashiyada la sameysay Wasaaradaha dowlad gobaleedyada ee Xannaanada Xoolaha ayaa waxa ay saldhig u noqoneysaa hannaanka horumarinta xoolaha dalka oo qayb ka ah ilaha dhaqaale ee ugu muhiimsan dalka.
