Ra’iisul Wasaaraha Xukuumadda Federaalka Soomaaliya Mudane Xasan Cali Khayre ayaa ka qeybgalaya shirka Madasha Dhaqaalaha Adduunka kaasi oo ka furmi doono Dalka Switzerland.
Shirka oo ay ka qeybgali doonaan hogaamiyaal ka kala socoda wadamada Caalamka ayaa la filayaa in looga hadlo arrimaha kobaca dhaqaalaha Adddunka iyo sidii loo caawin lahaa wadamada soo koraya oo Soomaaliya ay kujirto, wuxuuna furmaya bishan Janaayo gudeheeda.
Ra’iisul Wasaare Xasan Cali Khayre ayaa kamid ah hogaamiyaal ka socda Qaaradda Afrika, waxaana lafilayaa in uu kulamo la yeesho madax ka socota wadamada ku horumaray dhinaca dhaqaalaha.
Shirka ayaa ah mid muhiimad gaar ah u leh Soomaaliya, maadaama ay ku jirto wadamo yar oo Africa ka tirsan, kuwaasi oo si gaar ah loogu casuumay.
Dhinaca kale Ra’iisul Wasaaraha Soomaaliya wuxuu maanta la kulmay madaxda Wasaaradda Maaliyadda Dowladda Soomaaliya, isagoo ka dhageystay warbixin ku saabsan halka ay marayaan howlaha Wasaaradda.
Mudane Xasan Cali Kheyre ayaa kula dardaarmay madaxda Wasaaradda Maaliyadda in ay sii kordhiyaan dadaalkoodi ku aadan sidii loo horumarin lahaa wax soo saarka dhaqaalaha Dalka.
